朱古力暮絲蛋糕 + 咖哩牛肉煲 + 廟街四季

為補祝女朋友既生日 係星期六出左去旺角買左材料包係整蛋糕用既
覺得自己又有得玩 大家又有得食 都係一個唔錯既嘗試

首先就要將D牛油同埋餅乾碎搞埋一舊 成個過程都幾攰因為全部都係靠手力呀
同埋D牛油好香 十份吸引 搞到牛油同餅乾碎痴埋一齊個陣其實會覺得好細督覺得唔夠鋪平個餅底 不過經我努力係咁壓係咁壓之後 原來真係可以鋪平嫁喎

整好餅底就要放入雪櫃等一陣先用 然後就係將牛奶煮熱, 加入黑朱古力 同埋 vanilla香油
黑朱古力味道好香 試左少少仲好甜 覺得個蛋糕應該會幾甜幾好味

再一下步就係要將忌廉打至漿狀(其實我都唔知搞得夠唔夠但都搞左幾耐, 呢PART應該係重點, 有機會可以再研究下)跟住就要整溶魚膠粉(呢PART我覺得如果少D魚膠粉可能會好味D, 同埋有少少溶唔哂, 但係心急 唔理得咁多! 哈哈)

最後就係將全部野混埋一齊 然後放上個餅底上面 再放入雪櫃放一晚就食得
第二日其實應該準備好D 如果用茶隔"西"d可可粉上蛋糕面應該會好睇好多, 但係成個過程心急同埋緊張 ... 襯女朋友去廁所個陣諗住極速搞掂可惜佢出黎已經見到 插埋支可重新燃點既蠟燭 就大功告成 哈哈

同場加映 咖哩牛肉煲
其實咖哩都唔係第一次煮嫁啦 但係今次用肥牛煮就係第一次
首先將肥牛拖水 然後加入紅蘿蔔同埋薯仔 (事後先記得紅蘿蔔係要切片先岩 同埋份量可以減半, 兩樣都係)
煮出黎既湯汁就留係度待用
跟住就炒香洋蔥 然後就加湯汁 煮返滾個湯 然後就加埋紅蘿蔔同埋薯仔
煲滾之後 就放埋肥牛同埋咖哩磚入去
其實應該等D咖哩溶哂, 然後再起緊漿既時候先至放埋肥牛入去 咁就唔怕會UN

出黎既感覺其實都幾好 就係菜太多同埋唔夠漿
好既原因主要係咖哩入面有濃重既牛肉味 真係一流
唔好就係唔夠漿同埋成件事似湯多過咖哩

第二日同女朋友慶祝之後呢
夜晚就出左去廟街搵食 去左食四季 上次無食到 今次終於食到
我叫左臘腸滑雞飯, 無乜特別囉, 雞就幾好食 但係臘腸都唔夠香既??
女朋友叫左鳳爪排骨飯, 個鳳爪好細隻...
不過呢餐都幾搞笑既
因為隔離枱就坐左三個來自美國的男人
阿姐黎俾飯個陣, 佢自己話我唔識講喎, 就話XXXX飯
跟住鬼佬居然舉手, 我地心諗佢咁勁, 居然識聽
原來係扮識, 諗住拎哂D飯之後就自己分 但係奈可佢地見到兜飯都唔識分 ...
最後係我幫助下成就大業 (如果係三個大陸黎既人溝通唔到, 唔知會點呢?)
梅菜係唔知乜Q野cabbage ...
佢地就無好HIGH咁同我傾計, 而且年齡又大我一段, 所以我都無乜點撩
淨係傾左幾句, 知道佢地係美國人係因為佢地係咁恥笑自己: 話班人係度話班人係fucking stupid Americans...又話唔知班係度搞邊科etc. 都幾好笑
有個係Washington state 有個係Kentucky不過搬左去New Jersey
原本班人係UPS黎, 應該好有錢, 淨係響香港玩兩日, 我成機講香港玩兩日唔夠啦, 佢地話成日黎既, 先至發現有其中一個人著黑色UPS TEE

最後想講, 四季排咁長既隊食煲仔飯真係唔係特別好食-___-好普通
而且次次食完煲仔飯我就消化不良
夜晚返屋企睇法證大結局, 簡而言之, 爛尾

《序》

作為一位久經科學訓練的人，連開BLOG都認為要寫返個序章，將自己想開BLOG既原因列出並紀錄下來，整件事才叫得上完整

長話短說，係將近畢業既時候開BLOG係有幾個原因既
首先，我覺得自己做人做左廿幾年，回首一望覺得自己既腦袋空空，無乜特別詳細既記憶
其次，同女朋友拍拖約三年，我諗其實一樣影響得比較深既野，就係女朋友好鍾意影相，可以講得上係乜都影一餐，雖然當初就覺得好反感啦，好無聊好白痴，唔知有咩好影，就係我當時既感覺。畢竟時間耐左，睇返Ｄ相都覺得感覺唔錯，好多記憶就會被照片提起。所以好多人講影相講究技術，我反而覺得更講究背後既情。當然，係美國之旅之後都覺得適當地講究下技術，將相靚D好似記憶都好Ｄ咁。　從呢件事引伸，保存記憶係一件好重要既事，而作為一個感情複雜既男人，覺得文字係可以更清楚表達到自己既感受。所以想寫BLOG啦

咁作為一個即將畢業既大學生，呢個BLOG會主要講述咩內容呢？
1) 心路歷程　隨想
2) 人與人之間既互動
3) 煮野食既紀錄
4) 周圍發掘周圍食
5) 長跑,健身,YOGA(如果有)既紀錄

等我稍作介紹啦
其實處於學業工作既分水嶺覺得係人生一個重要既轉捩點 或者階段啦 想盡量留低自己既感受
而我就成日行行下都有野諗 有時唔記低就漂走左 覺得都幾可惜囉 應該要記低既 創作係人類其中好重要既一部份

人與人之間既事 我覺得"互動"最貼切 因為好多時唔係單純正面OR負面 好多灰色地帶 有時又會有D野諗既; 另外都想FOCUS下屋企人, 家姐屋企同埋佢個仔, 女朋友, 朋友仔等等, 將來會係一件值得記起既事

我就好為食既 但係除左食 我仲想學識點煮 某程度上我覺得都幾型嫁 目標呢可能係一個星期研究一道菜式 再放上黎分享分享

除左自己煮, 出街食都係我興趣之一黎既。係美國之旅後，覺得旅行其實細細地都得，有時發掘/行下D從未去過/從未食過既地方/餐廳，都不失為一個滿足好奇心同埋有趣既事。而且對自己身邊既地方多加認識係會令到自己生活更加有質感 角度會闊左。同時亦可以練習下影相

最後就係跑步 健身 YOGA 羽毛球既紀錄啦 最主要我會紀錄跑步同埋健身啦
因為又簡單又鍾意又好玩又有挑戰性更加可以整靚身型同埋健康D

啦....我話我好積極提升自己既歡樂指數, 唔係講笑嫁 =P 希望自己搵到份好工!